టీఆర్ఎస్ కు ఓటమి ఖాయం.. రాజకీయ సన్యాసానికి కేటీఆర్‌ సిద్ధ పడాలి : కొండా సురేఖా

టీఆర్ఎస్ కు ఓటమి ఖాయం.. రాజకీయ సన్యాసానికి కేటీఆర్‌ సిద్ధ పడాలి. కేసీఆర్ ప్రకటించిన తొలి జాబితాలో తన పేరు ప్రకటించకపోవడంతో తీవ్ర అసంతృప్తితో రగిలిపోతున్న వరంగల్ తూర్పు తాజా మాజీ ఎమ్మెల్యే,  టీఆర్ఎస్ నేత కొండా సురేఖ ఆ పార్టీకి రాజీనామా చేస్తున్నట్టు కొద్దిసేపటి కిందట ప్రకటించారు. మంగళవారం హైదరాబాద్ ప్రెస్‌క్లబ్‌లో జరిగిన మీడియా సమావేశంలో ఆమె మాట్లాడుతూ కేసీఆర్ కుటుంబాన్ని టార్గెట్ చేస్తూ విమర్శలు గుప్పించారు. గత నాలుగేళ్లుగా ప్రయత్నించినా, కేసీఆర్ తనకు అపాయింట్‌మెంట్ ఇవ్వలేదని, టీఆర్ఎస్ ఓ కుటుంబ పార్టీగా మారిపోయిందని ఆమె ఆరోపించారు. వరంగల్ వచ్చి కెప్టెన్ లక్ష్మీకాంతరావు ఇంట్లో బస చేసిన వేళ కూడా తనను కలిసేందుకు ఆయన ఆసక్తి చూపలేదు కనీసం మా తండ్రి చనిపోతే పలకరించడానికి రాలేదు కానీ, ఎర్రబెల్లి దయాకర్‌రావు ఇంటికి వెళ్లారని ధ్వజమెత్తారు. 

వచ్చే ఎన్నికల్లో గెలిచి కేటీఆర్‌ను సీఎంను చేయాలని భావిస్తోన్న కేసీఆర్, ఎంతో మంది సీనియర్ నాయకులను అణచివేస్తున్నారని విమర్శించారు. అమరవీరుల కుటుంబాలకు ఎందుకు టికెట్ ఇవ్వలేదని కొండా సురేఖ నిలదీశారు. తాను అడిగిన ఎన్నో ప్రశ్నలకు కేసీఆర్ నుంచి సమాధానాలు రాలేదని, ఈ మేరకు ఓ బహిరంగ లేఖను కూడా ఆమె విడుదల చేశారు. ప్రజాస్వామ్య విలువలకు కేసీఆర్ పాతరేశారని, క్యాబినెట్‌లో ఒక్క మహిళకు కూడా చోటు కల్పించలేని ఘనత ఒక్క టీఆర్ఎస్ ప్రభుత్వానికే దక్కుతుందని కొండా సురేఖ వ్యాఖ్యానించారు. 

ఓ బీసీ మహిళగా తనకు ఇవ్వాల్సిన కనీస గౌరవాన్ని కూడా ఇవ్వకుండా, కేసీఆర్ తన దొరతనాన్ని చూపించారని దుయ్యబట్టారు. ఇలాంటి పరిస్థితుల్లో కేసీఆర్, టీఆర్ఎస్‌ను నమ్మే పరిస్థితి లేదని, అందువల్లే రాజీనామా నిర్ణయాన్ని తీసుకున్నానని ఆమె వెల్లడించారు. వచ్చే ఎన్నికల్లో తెరాస అధికారంలోకి రాకపోతే రాజకీయ సన్యాసం చేస్తానని ప్రకటించిన కేటీఆర్‌ అందుకు సిద్దం ఉండాలని అన్నారు. వచ్చే ఎన్నికల్లో మహాకూటమి చేతిలో తెరాస ఓటమి ఖాయమని, కేసీఆర్ ఓడక తప్పదు.. రాజకీయ సన్యాసం తీసుకోక తప్పదని కొండా సురేఖ ఉద్ఘాటించారు. హైదరాబాద్‌లో కేటీఆర్ ఎన్ని సెటిల్‌మెంట్స్ చేస్తున్నారు, విచ్చలవిడిగా బార్లకు లైసెన్సులు మంజూరు చేస్తున్నారని ఆరోపించారు. వేల కోట్ల ప్రజాధనంతో కల్వకుంట్ల వారి ఖజానా నిండుతోందని వ్యాఖ్యానించారు. పొరుగు రాష్ట్ర ముఖ్యమంత్రి చంద్రబాబుతో ఏనాడు సఖ్యతగా ఉండలేదని, సోనియా, రాహుల్‌ను అసభ్యపదజాలంతో దూషించారని అన్నారు. 

 

 

రైతు బంధు పథకంతో ధనిక రైతులే లాభపడ్డారని, కేసీఆర్ పాలన అవినీతి పాలనగా మారిందని అన్నారు. డబుల్ బెడ్‌రూం ఇళ్లు, దళితులకు ఇస్తానన్న మూడెకరాల పొలం ఎందుకు ఇవ్వలేదని ప్రశ్నించారు. నెల రోజులు గడపుతానని అమెరికా నుంచి వచ్చిన కవిత, ఇక్కడే మకాం పెట్టారని, ఏ అర్హతతో ఆమె బంగారు బోనం ఎత్తుకున్నారు.. మాతంగి శాపనార్థలే టీఆర్ఎస్ ప్రభుత్వ పతనానికి నాందని కొండా సురేఖ జోస్యం చెప్పారు. ఎర్రబెల్లి దయాకర్‌రావు అల్లుడు కాంగ్రెస్‌లో ఉంటే తప్పలేదు గానీ, డీఎస్‌ కుమారుడు బీజేపీలో చేరితే విమర్శిస్తారా?. ఆయనకు ఓ న్యాయం.. డీఎస్‌కు ఓ న్యాయమా? అని నిలదీశారు.

మరో నాలుగు రోజుల్లో భవిష్యత్తు కార్యాచరణ ప్రకటిస్తానని, ఏ పార్టీలో చేరాలనేది కార్యకర్తలతో చర్చించి నిర్ణయం తీసుకుంటానని ఆమె స్పష్టం చేశారు. మా కుటుంబానికి చేసిన నమ్మకద్రోహాన్ని ప్రజలకు తెలియజెప్పేందుకే మీడియా ముందుకు వచ్చామని, పార్టీలో హరీశ్‌రావుకు కూడా అన్యాయం జరుగుతోంది కాబట్టే ఇటీవల ఆయన రాజకీయాలను నుంచి తప్పుకుంటే బాగుంటుందని వ్యాఖ్యానించారని అన్నారు. 

Spread the love

Leave a Reply

Your email address will not be published. Required fields are marked *

*