అమిత్ షా కి కౌంటర్ ఇచ్చిన కేటీఆర్

కేంద్ర ప్రభుత్వం ప్రతిష్టాత్మకంగా తీసుకొచ్చిన ‘ఆయుష్మాన్‌ భారత్‌’ జాతీయ ఆరోగ్య సంరక్షణ పథకాన్ని సెప్టెంబరు 23న ప్రధాని నరేంద్ర మోదీ ప్రారంభించిన విషయం తెలిసిందే. ఈ పథకం ద్వారా దేశవ్యాప్తంగా 10 కోట్ల కుటుంబాలకు లబ్దికలుగుతుందని అంచనా వేస్తున్నారు. అయితే, ఈ పథకం కంటే తమ రాష్ట్రంలో అమలవుతోన్న ఆరోగ్య శ్రీనే గొప్పదన్న టీఆర్ఎస్ నేతల వ్యాఖ్యలతో వివాదం రేగింది. దీంతో టీఆర్ఎస్, బీజేపీల మధ్య మాటల యుద్ధం మొదలైంది. తెలంగాణ ప్రభుత్వాన్ని విమర్శిస్తూ అమిత్ షా తెలుగులో ట్వీట్ చేయగా, దానికి మంత్రి కేటీఆర్ అంతే ధీటుగా సమాధానం ఇచ్చారు. 

అమిత్ షా విమర్శలపై కేటీఆర్ తనదైన శైలిలో స్పందించారు. ట్విటర్ వేదికగా అమిత్ షాకు కౌంటర్ ఇచ్చిన కేటీఆర్.. -అమిత్ షా గారు మీకు తప్పుడు సమాచారం అందింది. తెలంగాణలో అమల్లో ఉన్న ఆరోగ్య శ్రీ పథకం వల్ల 80 లక్షల మందికి మేలు జరుగుతోంది. కానీ ఆయుష్మాన్ భారత్ పథకం వల్ల తెలంగాణలో కేవలం 25 లక్షల మందికే లబ్ది చేకూరుతుంది.. యూనివర్సల్ హెల్త్ కవరేజ్‌లో తెలంగాణ రాష్ట్రం ఓ రోల్ మోడల్‌గా ఉంది’అంటూ ఘాటుగా ట్వీట్ చేశారు. 

‘ప్ర‌ధాన‌మంత్రి మోదీ ప్రారంభించిన జ‌న ఆరోగ్య యోజ‌న- ఆయుష్మాన్ భార‌త్ కార్య‌క్ర‌మం ప్ర‌పంచంలోనే చాలా గొప్ప‌ది. అలాంటి కార్య‌క్ర‌మాన్ని తెలంగాణ ప్ర‌జ‌ల‌కు అంద‌కుండా టీఆర్ఎస్ ప్ర‌భుత్వం వ్య‌వ‌హ‌రించ‌డం బాధాక‌రం’ అంటూ ట్విట్టర్‌లో అమిత్ షా వ్యాఖ్యానించారు. 

టీఆర్ఎస్ ప్రభుత్వ స్వార్థ ఆలోచన కారణంగా తెలంగాణ పేదలు ఈ అద్భుతమైన కార్యక్రమ ప్రయోజనాలు పొందలేకపోతున్నారు.. దీనిపై తెలంగాణ ప్రభుత్వం ప్రజలకు సమాధానం చెప్పాలని షా నిలదీశారు. పేదల వ్యతిరేక నిర్ణయాన్ని తీసుకున్న టీఆర్ఎస్ ప్రభుత్వాన్ని బీజేపీ కార్యకర్తలు నిలదీయాలని, ఇంటింటికీ వెళ్లి ప్రజలను జాగృతం చేయాలని షా సూచించారు.

Spread the love

Leave a Reply

Your email address will not be published. Required fields are marked *

*