రేవంత్ రెడ్డి ఇంటిపై ఐటి దాడి.. టీఆర్ఎస్ పై విరుచుకుపడ్డ ఉత్తమ్….!

 రేవంత్ రెడ్డి ఇంటిపై ఐటి దాడి.. టీఆర్ఎస్ పైవిరుచుకుపడ్డ ఉత్తమ్….!తెలంగాణ కాంగ్రెస్ వర్కింగ్ ప్రెసిడెంట్ రేవంత్ రెడ్డి నివాసాలపై గురువారం ఉదయం ఐటీ ఏకకాలంలో దాడులకు నిర్వహించిన విషయం తెలిసిందే. రాజకీయ కక్షసాధింపుతోనే టీఆర్ఎస్ ప్రభుత్వం ఈ దాడులను చేయించినట్టు కాంగ్రెస్  పార్టీ ఆరోపించింది. దీనిపై టీపీసీపీ అధ్యక్షుడు ఉత్తమ్‌కుమార్ రెడ్డి ట్విట్టర్ ద్వారా విమర్శలు గుప్పించారు. ‘రాజకీయ కక్షతోనే కాంగ్రెస్‌ వర్కింగ్‌ ప్రెసిడెంట్‌ రేవంత్‌రెడ్డి ఇంట్లో ఐటీ దాడులు జరుగుతున్నాయి.

ఎన్నికల సమయంలో పాత కేసులను తిరగదోడి బలమైన కాంగ్రెస్‌ నేతలను అణగదొక్కేందుకు కేసీఆర్‌ ప్రయత్నిస్తున్నారు.. బీజేపీ, కేంద్ర ప్రభుత్వంతో చేతులు కలిపిన కేసీఆర్‌కు ప్రజలు గుణపాఠం చెబుతారు.. ఐటీ దాడులు టీఆర్ఎస్ చేతకానితనానికి నిదర్శనం.. దీన్ని తీవ్రంగా ఖండిసున్నానని’ అంటూ ఘాటుగా విమర్శించారు.

‘ముందు జగ్గారెడ్డి, ప్రస్తుతం రేవంత్ రెడ్డి.. ఇది కేసీఆర్ పిరికితనానికి నిదర్శనం.. తమ పార్టీ నేతలను నేరుగా ఎదుర్కోలేకే ఇలాంటి చర్యలకు పాల్పడుతున్నారు. కేసీఆర్ నిరంకుశ, నియంతృత్వ‌ పాలన నుంచి తెలంగాణకు విముక్తి కల్గించడానికి కాంగ్రెస్ పార్టీ ఐక్యంగా పోరాడుతుంది’ అని ఉత్తమ్ ట్వీట్ చేశారు. 

 

ఎన్నికల సమయంలో కాంగ్రెస్‌ నేతలపై ఐటీ దాడులు పరిపాటిగా మారిందని కాంగ్రెస్‌ నేత వేం నరేందర్‌రెడ్డి విమర్శించారు. రేవంత్‌రెడ్డి నివాసంపై ఐటీ దాడులు జరుగుతున్న నేపథ్యంలో జూబ్లీహిల్స్‌లోని రేవంత్ నివాసానికి ఆయన కార్యకర్తలతో సహా చేరుకున్నారు. ఓడిపోతామన్న భయంతోనే కేసీఆర్‌ సర్కారు కాంగ్రెస్‌ ముఖ్య నేతలను టార్గెట్‌ చేస్తోందని ఆయన ఆరోపించారు. సోదాలకు కాంగ్రెస్‌ పార్టీ ఏ మాత్రం భయపడేది లేదన్నారు. 

రేవంత్‌రెడ్డి నివాసంలో ఐటీ సోదాలను తీవ్రంగా ఖండిస్తున్నట్లు కాంగ్రెస్‌ నేత సీతక్క పేర్కొన్నారు. కేసీఆర్, కేటీఆర్, కవిత ఇళ్లలో దర్యాప్తు సంస్థలు సోదాలు నిర్వహించి తమ నిజాయితీని చాటుకోవాలని, కేసీఆర్ బంధువులు, ఆ పార్టీకి చెందిన నేతలపై ఉన్న పాతకేసులపై దర్యాప్తు చేస్తే ఎవరి గుట్టు ఏంటో తెలుస్తుందని విమర్శించారు. కేసీఆర్‌ సర్కారు అణచివేత విధానాలకు పాల్పడుతోందని, కాంగ్రెస్‌ పార్టీని భయపెట్టేందుకు మొన్న జగ్గారెడ్డిని, ఈరోజు రేవంత్‌రెడ్డిని టార్గెట్‌ చేశారని ఆమె ధ్వజమెత్తారు.

కాంగ్రెస్ నేత షబ్బీర్ అలీ మాట్లాడుతూ.. ఈ దాడులతో కాంగ్రెస్ కార్యకర్తలను భయపెట్టాలని కేసీఆర్ చూస్తున్నారని, తమను ఇబ్బందిపెట్టాలని చూసినా భయపడే ప్రసక్తేలేదని అన్నారు. సభలో ప్రజాసమస్యలపై చర్చిద్దామంటూ, సంతాపాలతోనే సరిపెట్టేస్తున్నారని షబ్బీర్ అలీ విమర్శించారు. 

Spread the love

Leave a Reply

Your email address will not be published. Required fields are marked *

*