గీతం విద్యా సంస్థల అధినేత కన్నుమూత

అమెరికాలో జరిగిన రోడ్డు ప్రమాదంలో గీతం విద్యా సంస్థల అధినేత, టీడీపీ ఎమ్మెల్సీ డాక్టర్ ఎంవీవీఎస్‌ మూర్తి దుర్మరణం చెందారు. స్థానిక కాలమానం ప్రకారం సోమవారం మధ్యాహ్నం కాలిఫోర్నియా నుంచి అలస్కాలోని ఆంకరేజ్‌‌ సఫారీని సందర్శించేందుకు ఆయన తన స్నేహితులతో కలిసి వెళ్తుండగా ఈ ప్రమాదం చోటుచేసుకుంది. వీరు ప్రయాణిస్తున్న వాహనం ఎదురుగా వస్తున్న ట్రక్కును ఢీకొట్టడంతో ఎంవీవీఎస్ మూర్తితోపాటు కారులో ప్రయాణిస్తున్న వెలువోలు బసవపున్నయ్య, వీరమాచినేని శివప్రసాద్, వీబీఆర్‌ చౌదరిలు అక్కడికక్కడే మృతి చెందారు. మరో వ్యక్తి కడియాల వెంకటరత్నం(గాంధీ) తీవ్రంగా గాయపడ్డారు. ప్రమాద సమాచారం తెలుసుకున్న తానా సభ్యులు ఘటనాస్థలానికి చేరుకుని, గాయపడిన వెంకటరత్నాన్ని హాస్పిటల్‌కు తరలించారు. ఆయన పరిస్థితి కూడా విషమంగా ఉన్నట్టు తెలుస్తోంది. అక్టోబరు 6న కాలిఫోర్నియాలో జరగనున్న గీతం పూర్వవిద్యార్థుల సమావేశంలో ఎంవీవీఎస్ మూర్తి ప్రసంగించాల్సి ఉంది.

తూర్పు గోదావరి జిల్లాలోని ఓ గ్రామంలో జన్మించిన మతుకుమిల్లి వీర వెంకట సత్యన్నారాయణ మూర్తి గోల్డ్ స్పాట్ మూర్తిగా తెలుగువారికి సుపరిచితులు. 80, 90 దశకంలో ఏపీలో పాపులర్ అయిన గోల్డ్‌స్పాట్ కూల్ డ్రింక్ ఉత్పత్తి సంస్థను ప్రారంభించింది ఈయనే. అనంతరం గీతం విద్యా సంస్థలను ఏర్పాటుచేశారు. గాంధేయవాదాన్ని అనుసరించే ఎంవీవీఎస్ ఆయన పేరుతో మహాత్మా గాంధీ ఇన్‌స్టిట్యూట్ ఆఫ్ టెక్నాలజీ అండ్ మేనేజ్‌మెంట్ (గీతం) సంస్థను ఏర్పాటు చేశారు. తెలుగు రాష్ట్రాల్లో ఈ విద్యా సంస్థకు ఓ ప్రత్యేక గుర్తింపు ఉంది. అనంతరం ఇదే గీతం వర్సిటీగా రూపాంతరం చెందింది. తూర్పు గోదావరి, విజయనగరం, విశాఖ జిల్లాల్లో రాష్ట్ర ప్రభుత్వంతో కలిసి ఇంటర్, డిగ్రీ కాలేజీలను సైతం ప్రారంభించారు. 

విద్యావేత్తగానే కాదు రాజకీయాల్లోనూ ఆయన తనదైన ముద్రవేశారు. టీడీపీ తరఫున విశాఖ పార్లమెంటుకు ఎంపికైన ఎంవీవీఎస్ మూర్తి సౌమ్యుడిగానూ గుర్తింపు తెచ్చుకున్నారు. 1991 సాధారణ ఎన్నికల్లో టీడీపీ తరఫున విశాఖ పార్లమెంటు స్థానం నుంచి పోటీచేసిన ఎంవీవీఎస్ మూర్తి విజయం సాధించారు. తర్వాత 96, 98 ఎన్నికల్లో ఓటమిపాలైనా 1999 సాధారణ ఎన్నికల్లో రెండోసారి ఎన్నికయ్యారు. నటుడు, హిందూపురం ఎమ్మెల్యే బాల‌కృష్ణకు ఈయన స్వయానా బంధువు కూడా. బాలయ్య చిన్న కుమార్తె తేజస్వినికి, మూర్తి మనవడు శ్రీభరత్‌కు ఐదేళ్ల కిందట వివాహం జరిగింది. 

గత సాధారణ ఎన్నికల్లో విశాఖ పార్లమెంటు స్థానం పొత్తుల్లో భాగంగా బీజేపీకి ఈ సీటును టీడీపీ వదిలేసింది. బీజేపీ అభ్యర్థిగా కంభపాటి హరిబాబు బరిలో దిగడంతో డాక్టర్ ఎంవీవీఎస్ మూర్తి పోటీకి దూరంగా ఉన్నారు. అయితే, ఈసారి మారిన పరిస్థితుల నేపథ్యంలో విశాఖ నుంచి ఎంవీవీఎస్ మూర్తిని తమ అభ్యర్థిగా నిలపాలని టీడీపీ భావిస్తోంది. అయితే, ఇంతలోనే ఆయన రోడ్డు ప్రమాదంలో దుర్మరణం చెందడం బాధాకరం.డాక్టర్‌ ఎంవీవీఎస్‌ మూర్తి ఆకస్మిక మృతిపై ముఖ్యమంత్రి చంద్రబాబు నాయుడు తీవ్ర దిగ్భ్రాంతి వ్యక్తం చేశారు. మూర్తి ఆత్మకు శాంతి కలగాలని కోరుకున్న బాబు, వారి కుటుంబ సభ్యులకు తన ప్రగాఢ సానుభూతి తెలియజేశారు. ఏపీ మంత్రులు నారా లోకేష్‌, యనమల రామకృష్ణుడు, గంటా శ్రీనివాస్‌రావులు ఎంవీవీఎస్‌ మూర్తి హఠాన్మరణంపై దిగ్భ్రాంతి వ్యక్తం చేసి, ఆయన ఆత్మకు శాంతి చేకూరాలని కోరుకున్నారు.

Spread the love

Leave a Reply

Your email address will not be published. Required fields are marked *

*