వచ్చే ఎన్నికల్లో ఆ మూడు రాష్ట్రాల్లో బీజేపి పరాజయం పాలు….!

 

వచ్చే ఎన్నికల్లో ఆ మూడు రాష్ట్రాల్లో బీజేపి పరాజయం పాలు….! సెమీ ఫైనల్స్‌గా భావిస్తోన్న రాజస్థాన్, మధ్యప్రదేశ్, చత్తీస్‌గఢ్ శాసనసభ ఎన్నికల్లో అధికార బీజేపీకి పరాభవం తప్పదని ఒపీనియన్ పోల్స్ వెల్లడిస్తున్నాయి. అంతేకాదు, రాజస్థాన్‌లో కాంగ్రెస్‌ పార్టీ పూర్తి ఆధిక్యతతో అధికారం చేపడుతుందని ఢంకా బజాయిస్తున్నాయి. రాజస్థాన్, చత్తీస్‌గఢ్, మధ్యప్రదేశ్‌లో నిర్వహించిన సర్వే ఫలితాలను ఏబీపీ- సీఓటర్ వెల్లడించింది. గత రెండు దశాబ్దాలుగా రాజస్థాన్‌లో ఐదేళ్లకు ఒకసారి అధికార మార్పిడి అనే సంప్రదాయం ప్రకారం చూసినా ప్రస్తుతం బీజేపీకి ఓటమి తప్పదని అంటున్నారు. ఇక మధ్యప్రదేశ్, చత్తీస్‌గఢ్‌లో పదిహేనేళ్ల తర్వాత మళ్లీ అధికారంలోకి రావాలని భావిస్తోన్న కాంగ్రెస్‌కు అనుకూలంగా ఉన్నా, అధికార బీజేపి కూడా గట్టిపోటీని ఇస్తుందని, ఈ రెండు రాష్ట్రాల్లో హోరాహోరీ పోరు తప్పదని తెలిపింది.

 ఎవరు విజయం సాధించినా స్వల్ప మెజార్టీతోనే గట్టెక్కుతారని అభిప్రాయపడింది. బీజేపీ ప్రభుత్వాలపై వ్యతిరేకత వ్యక్తమవుతున్నా, మధ్యప్రదేశ్‌ సీఎం శివరాజ్‌ సింగ్‌ చౌహాన్‌, ఛత్తీస్‌గఢ్‌ సీఎం రమణ్‌సింగ్‌లకు మాత్రం ఓటర్లు తొలి ప్రాధాన్యత ఇవ్వడం చెప్పుకోదగ్గ అంశం. కాంగ్రెస్‌-బీజేపీల మధ్య పోటీ నువ్వానేనా అన్నట్లు ఉంటుందని మధ్యప్రదేశ్‌లో హస్తానికి 42.2 శాతం, కమలానికి 41.5 శాతం ఓట్లు దక్కుతాయని అంచనా వేసింది. ఇక ఛత్తీస్‌గఢ్‌లో కాంగ్రెస్ 38.9 శాతం, బీజేపీ 38.2 శాతం ఓట్లు దక్కించుకుంటాయని ఏబీపీ న్యూస్‌-సీ ఓటర్‌ సర్వేలో వెల్లడయ్యింది. 

ఇక, రాజస్థాన్‌లో మాత్రం అధికార-విపక్షాల ఓట్ల శాతంలో మాత్రం భారీ వ్యత్యాసం ఉండే అవకాశం ఉంది. కాంగ్రెస్‌ 49.9 శాతం ఓట్లు దక్కించుకుంటే, బీజేపీకి 34.3 శాతం ఓట్లు లభించే అవకాశం ఉందని ఏబీపీ సర్వే తెలపగా, కాంగ్రెస్‌కు 50 శాతం, బీజేపీకి 43 శాతం ఓట్లు రావచ్చని సీ-ఫోర్‌ లెక్కవేసింది.  రాజస్థాన్‌లో సీఎం అభ్యర్థిగా కాంగ్రెస్ నేత సచిన్ పైలట్‌కు ఎక్కువ మంది మద్దతు తెలియజేస్తున్నారు. ఆయన సీఎం కావాలని 36 శాతం మంది కోరుకోగా, వసుంధరా రాజేకు కేవలం 27 శాతం మందే మద్దతుగా నిలిచినట్టు ఏబీపీ న్యూస్‌ సర్వేలో వెల్లడయింది. మాజీ సీఎం అశోక్‌ గెహ్లాట్‌ వైపు 24 శాతం మందే మొగ్గు చూపించారు.

రాజస్థాన్‌లో మొత్తం 200 స్థానాల్లో కాంగ్రెస్ 142, బీజేపీ 56, ఇతరులు 2 స్థానాల్లో విజయం సాధిస్తాయని సర్వే తెలిపింది. మధ్యప్రదేశ్‌లోని 230 స్థానాల్లో కాంగ్రెస్‌ 122, బీజేపీ 108 స్థానాల్లో, చత్తీస్‌గఢ్‌లో 90 స్థానాల్లో కాంగ్రెస్ 47, బీజేపీ 41 స్థానాల్లో గెలుపొందుతాయని అంచనా వేసింది.  మధ్యప్రదేశ్, చత్తీస్‌గఢ్, రాజస్థాన్ ఎన్నికల్లో విజయం సాధించి మరోసారి అధికారం చేపడతామని బీజేపీ అంటోంది. ఆ పార్టీ సీనియర్ నేత, కేంద్ర న్యాయ శాఖ మంత్రి రవిశంకర్ ప్రసాద్ మాట్లాడుతూ.. తాము చేపట్టిన అభివృద్ధి, సంక్షేమ కార్యక్రమాలే మరోసారి ఈ మూడు రాష్ట్రాల్లో గెలుపొందడానికి దోహదం చేస్తాయని అన్నారు. 

Spread the love

Leave a Reply

Your email address will not be published. Required fields are marked *

*